ابن فطيس \ يا الله عفوك

يا الله عفوك يوم تصفية الحساب
يومٍ حصاد لما زرعنا في السنين
يوم الحشر قرب ولا معنا زهاب
اليوم في الدنيا وبكره راحلين
نجع ذنوب ونرتجي عفو وثواب
وعلى نصر ربي لنا مستعجلين
تدرون ليه أمالنا كنها سراب
تدرون ليه النصر سيف الأولين
الأولين أعمالهم وفق الكتاب
قاموا عليه وباعوا الدنيا بدين
وحنا غفلنا بين ما لذ وطاب
والنصر سيفٍ ما يسله غافلين
نصبح على شوف انتهاكات وخراب
ونمسي على دمع وتنهات ونين
بصدورنا شي تذوب اله الهضاب
وأفعالنا والواقع رياح ..وطحين
وعلى العيون من الفتن مثل الضباب
ما عاد ندري من يسار ومن يمين
ما للضعيف إلا الدعاء لو ما يجاب
ما غيره إلا الشوف مكتوف اليدين
يالله زلزل تحت الأعداء التراب
وألطف بنا واحقن دماء المسلمين
ندعيك يا قادر على جعل السحاب
جيش لنصرة قلةٍ مستضعفين
أغرقهم بنوع من أنواع العقاب
غرق الغلام اللي يحسب انه فطين
لوما عصى نوحٍ نجا به في رحاب
سفينته وأمضى معه في العمر حين
لكنه اختار الخسارة والذهاب
اصنع بهم صنعك به وأنت المتين
وألا أخذهم يا مجري ٍ سود الحقاب
اخذ العجوز اللي بقت في الغابرين
ذوقهم اللهم أنواع العذاب
اللي عثوا في أرضك امن المفسدين
وألطف بمن لبسوا من التقوى ثياب
عبادك المستهدفين المتقين
تكالبت عليهم أنياب الذئاب
ولا غير عونك يا معين الصابرين
من بينهم شيبه يعجزون الشباب
من وقفته من طولها في الركعتين
ومن بينهم عذرا تصيح بلا حجاب
احجابها لفوا به الجرح المكين
تصيح ما هو من ألم ولا صواب
تبغى الحجاب اللي خذوه المسعفين
وطفلٍ عن عيون أمه الثنتين غاب
تبكيه عين وتلتفت لأخيه عين
من هول ما يجري لهم شاب الغراب
يا وسع حلمك وأنت ما فوقك مدين
أدعيك وأنت أدرى بحال أهل المصاب
وأمد كفي لك يا أكرم الأكرمين