قصيدة قلبي قلب طير .. في رثاء الاب

ابتسم قدام خلق الله كثير
بس فيني حزن اكثر || اكتمه .

. آتظاهر بالفرح || واني بخير
والحقيقة عند نفسي مؤلمة .

. صارت الدنيا سراب ابلا مصير
صارت الدنيا بوجهي مظلمة .

. صارت الدنيا علينا تستدير
راح ابوي وجت هموم منضّمه .

. كنت اشوفه غير كل الناس غير
قبل يحكي يعلم الله افهمه .

. كنت اشوفه بيننا مثل الأمير
كنت ادعي ياعساني ماعدمه .

. كنت كل ماغاب ادعي واستجير
وآترجا بس شوفة مبسمه .

. لاتروح وتترك (ا)وليدك سهير
او خذه وياك احسن وارحمه .

. الحياة ابدون وجهك وش تصير ؟!!!
ياحبيبي فيك حزني ماعظمه .

. كيف شيب الوجه بيّن بالصغير
والبياض اشلون باين مُعظمه .

. هذي اول رحلتي .. وضعي خطير
والظروف الحين صارت مُبهمه .

. شلت هم وكنه الهم الكبير
وشكل هذا الهم بس مقدمه .

. كل ما احلم حلم من بعدك يطير
مابقى لي حلم اصلا احلمه .

. من بعد فرقاك ودموع تسير
عظم الله فيك اجري عظمه .

. صدر فارس بحر هم ٍ مستثير
لو كتم بالصدر يطلع من فمه .

. يذكرونك كل خلق الله بخير
كلهم قالوا عسى الله يرحمه .

. ياعسى الفردوس مسكنك الاخير
عند رب البيت مابين انعمه .

. والا انا يابوي قلبي قلب طير
ابتسم والحزن فيني اكتمه .